19. märts 2024

Võrokeeline jututarõ

Vahtsõaastakuu perämädsel neläpääväl (30.01.20) oll` jälki võrokeeline jututarõ Kadrioro raamadukogon. Tubli nuur võrokõnõ (TVS-i liigõ) Orioni Jana, kiä sääl tüütäs, om käümä saanu üle neläpääviti üte ummamuudu keelekohvigu.

Joba peris mitmõndat kõrda kogonõs Talina Võro Seldsi rahvas ja ka muid inemiisi, kiä võro keelest luku pidävä, võro kiilt kõnõlõma Tammsaarõ muuseumi katusõ ala, on ka tuu raamadukogo om.

Janal om asi alati ettevalmistõt: kõrd tege viktoriini, kõrd om pääteemas määnegi võrokeelinõ raamat,kõrd om Häniläne kohal, kõrd vahtsõmba uudissõ “kodomaalt”…

Ka draamatiatri võrukeelist tükkü “Põud ja vihm” olõmi läbi “haksõldanu”. Egä kõrd saa kiäki midägi vahtsõt teedä lobilavva uudissist. Om nalla ja naaru, om ka tõsist juttu. Hüä õhkkund tege meele rõõmsas.

Seokõrdnõ kokkosaaminõ oll` tsipa piduligumb. TVS-i juhatusõ liigõ Plumanni Kaja-Riina säädse üles uma maali-,näpo- ja kirätüü näütüst.

Ammõtlik avaminõ om puulpäävä 1.02.20 kell 14.00, a mii saimi tutvusõ poolõst varrampa nätä. Tasus iks võrokõnõ olla!

Ja olku suurõ saladusõ kattõ all viil üteldü, et õkva avamisõ pääväl om Kaja-Riinal ka sündümise päiv. Nii-et egäüts, kiä tulõ näütüst kaema, või tälle ka hällüpääväs õnnõ suuvi!

Näitusepildil on  (vasakult) Külli Müürsepp, Kaja Tamm, Eha Urbanik, Kaja-Riina Plumann (keskel lilledega), Helbe Liin, Ott Rüütel, Ellen-Reet Türi, Olev Sokk, Siiri Ristikivi,Viive Pallok

 

Müürseppa Külli
Tallinna Võru Selts